|
డీఎంఆర్‌సీతో తెగతెంపులు..నూతన సంస్థ కోసం టెండర్లు
|
డీపీఆర్‌ రూపకల్పనకు నూతన సంస్థ కోసం టెండర్లు
నాలుగు నెలలే గడువు
ప్రస్తుత కారిడార్లతోపాటు పొడిగింపునకు నిర్దేశం
ఎయిర్‌ పోర్టు, జక్కంపూడి, కృష్ణా కెనాల్‌ జంక్షన్‌ వరకు..
ఇండియా, జర్మనీలలో పేపర్‌ నోటిఫికేషన్‌
జర్మనీ ఆర్థిక సంస్థ సహకారంతో ముందుకు
విజయవాడ: నగరంలో మీడియం మెట్రో ప్రాజెక్టు స్థానంలో లైట్‌ మెట్రో రైల్‌ప్రాజెక్టు వైపు ప్రభుత్వం ఆసక్తి చూపిస్తుండటంతో ఇప్పటివరకు మెట్రో ప్రాజెక్టుకు సలహాదారుగా ఉన్న డిల్లీ మెట్రో రైల్‌ కార్పొరేషన్‌ (డీఎంఆర్‌సీ)తో అమరావతి మెట్రో రైల్‌ కార్పొరేషన్‌ (ఏఎంఆర్‌సీ) తెగతెంపులు చేసుకుంది. లైట్‌ మెట్రో రైల్‌ ప్రాజెక్టుకు ఇతర కన్సల్‌టెంట్‌ను నియమించుకోవటానికి బుధవారం టెండర్లను పిలిచింది. లైట్‌ రైల్‌ ప్రాజెక్టును చేపట్టడానికి తక్షణం సమగ్ర ప్రాజెక్టు నివేదిక (డీపీఆర్‌)కు రూపకల్పన చేయాల్సి ఉండటంతో అమరావతి మెట్రో రైల్‌ కార్పొరేషన్‌ (ఏఎంఆర్‌సీ ) రంగంలోకి దిగింది. లైట్‌రైల్‌ ప్రాజెక్టుకు డీపీఆర్‌ రూపకల్పన చేయటానికి కన్సల్టెన్సీ సంస్థను ఎంపికచేసేందుకు టెండర్ల ప్రక్రియను పూర్తి చేసింది. టెండర్‌ నోటిఫికేషన్‌ను ఏఎంఆర్‌సీ వెబ్‌పోర్టల్‌లో పొందుపరిచారు. నాలుగురోజుల్లో అధికారికంగా పేపర్‌ నోటిఫికేషన్‌ ఇవ్వనున్నారు. విజయవాడ నగరానికి లైట్‌ రైల్‌ ప్రాజెక్టును ఎంపిక చేయటంతో మీడియం మెట్రో బాధ్యతల నుంచి వైదొలగటం జరిగింది. మీడియం మెట్రోకు డీపీఆర్‌ను డిల్లీ మెట్రో రైల్‌ కార్పొరేషన్‌(డీఎంఆర్‌సీ)రూపొందించింది. లైట్‌ రైల్‌కు డీపీఆర్‌ను డీఎంఆర్‌సీ కాకుండా మరో సంస్థతో చేపట్టాలని ప్రభుత్వం నిర్ణయించటంతోనే మళ్లీ కొత్తగా టెండర్లు పిలవాల్సి వచ్చింది.
లైట్‌ రైల్‌ ప్రాజెక్టు డీపీఆర్‌ కోసం దేశవ్యాప్తంగా ఉన్న కన్సల్‌టెంట్లతో పాటు జర్మనీ దేశంలో కూడా పేపర్‌ నోటిఫికేషన్‌ ఇవ్వనున్నారు. లైట్‌ రైల్‌ ప్రాజెక్టును జర్మనీ ఆర్థిక సంస్థ కేఎఫ్‌డబ్ల్యూ సంస్థ సహకారంతో చేపడుతున్న నేపథ్యంలో, ఆ సంస్థ సూచించిన మార్గదర్శకాల ప్రకారమే టెండర్ల ప్రక్రియను రూపొందించింది. ఒకరకంగా ఏఎంఆర్‌సీ గ్లోబల్‌ టెండర్లను పిలిచింది. ఇంతకుముందు మీడియం మెట్రో ప్రాజెక్టు బందరు, ఏలూరు రోడ్లలో 27 కిలోమీటర్ల పరిధిలో పీఎన్‌బీఎస్‌ నుంచి పెనమలూరు సెంటర్‌ , రైల్వే స్టేషన్‌ నుంచి నిడమానూరు సెంటర్‌ వరకు నిర్దేశించిన సంగతి తెలిసిందే. తాజాగా లైట్‌ రైల్‌ కారిడార్‌లో ఈ కారిడార్‌ నిడివి మరింత పెరగబోతోంది. ప్రస్తుత కారిడార్లతోపాటు అంతర్గతంగా ఫీజుబిలిటీ ఉన్న రూట్లకు సంబంధించి కూడా ఏఎంఆర్‌సీ నివేదిక కోరింది. లైట్‌ రైల్‌ ప్రాజెక్టును విజయవాడ నుంచి ఎయిర్‌పోర్టు వరకు, అలాగే జక్కంపూడి, కృష్ణా కెనాల్‌ జంక్షన్‌ వరకు లైట్‌ రైల్‌ కారిడార్లకు అవకాశం ఉన్న మార్గాలను అధ్యయనంచేసి నివేదిక ఇవ్వాల్సిందిగా కోరింది. మీడియం మెట్రో ప్రాజెక్టుకు ప్రత్యామ్నాయంగా చేపడుతున్న లైట్‌ మెట్రో ప్రాజెక్టుకు సంబంధించి ప్రస్తుత 27 కిలోమీటర్లే కాకుండా వీటికి క్రాస్‌ అయ్యేలా కూడా ఫీజిబిలిటీ ఉంటే తగిన ప్రతిపాదనలను అందించాల్సిందిగా సూచించింది. ఎయిర్‌పోర్టు వరకు పొడిగిస్తూ డీపీఆర్‌ కోరటంతో నిడమానూరు రైతులకు పెద్ద ఊరట లభించినట్టు అవుతుంది. నగర వాయువ్య దిశన ఉన్న జక్కంపూడికి కూడా లైట్‌రైల్‌ ప్రాజెక్టు కారిడార్‌ను ప్రతిపాదించటం తో ర్యాపిడ్‌ గ్రోత్‌ ప్రాంతానికి కనెక్టివిటీ ఇస్తున్నట్టుగా భావించాల్సివ స్తోంది. జక్కంపూడిని ఆర్థిక నగరంగా అభివృద్ధి చేయాలని ప్రభుత్వం భావిస్తున్న నేపథ్యంలో, ఈ ప్రాంతానికి మార్గం కల్పించటం విశేషం! తాడేపల్లి సమీపంలోని కృష్ణా కెనాల్‌ జంక్షన్‌ వరకు కారిడార్‌ను పొడిగిస్తూ నివేదిక కోరటం వెనుక చూస్తే.. రానున్న రోజుల్లో అమరావతి రాజధానికి కూడా అనుసంధానం చేసేలా ముందుగానే డీపీఆర్‌ కోరటం జరిగింది. సమగ్ర ప్రాజెక్టు నివేదికలో భాగంగా ఫీజుబిలిటీ ఉన్న రోడ్లు, రూట్‌ అలైన్‌మెంట్స్‌ , భూ ప్రతిపాదనలు, లైట్‌ రైల్‌ స్టేషన్స్‌, ఎలక్ర్టిక్‌ సబ్‌ స్టేషన్స్‌, మెయింట్‌నెన్స్‌ డిపోలు, ప్రభుత్వం ద్వారా సేకరించాల్సిన భూములు, రోలింగ్‌ స్టాక్‌కు అంచనాలు రూపొందించడం, పర్యావరణ అనుమతులు, సోషల్‌ ఇంపాక్ట్‌ అసెస్‌మెంట్‌, ఫైనాన్షియల్‌ ఎకనమిక్‌ వయబిలిటీ (ఎఫ్‌ఐఆర్‌ఆర్‌, ఈఐఆర్‌ఆర్‌) వంటివన్నీ కన్సల్‌టెంట్‌ సంస్థ రూపొందించి అందచేయాల్సి ఉంటుంది.
నాలుగు నెలలే గడువు
డీ పీఆర్‌ రూపకల్పనకు కన్సల్‌టెంట్‌ సంస్థకు నాలుగు నెలల స్వల్ప గడువును మాత్రమే ఏఎంఆర్‌సీ నిర్దేశించింది. ఇంకా ఎక్కువ కాలం నిర్దేశిస్తే కాలహరణం జరుగుతుందన్న ఉద్దేశంతో డీ పీఆర్‌కు తక్కువ సమయాన్ని నిర్దేశించింది. డీపీఆర్‌ చేతికి అందగానే వెంటనే ప్రభుత్వం దృష్టికి తీసుకువెళ్లి .. దానికి ఆమోదముద్ర వే సి వెంటనే ఇన్నోవేటివ్‌ పీపీపీ విధానంలో టెండర్లను పిలవనుంది.
ఇన్నోవేటివ్‌ పీపీపీ విధానంలో ప్రాజెక్టు నిర్వహణ
ఇటీవల కేంద్రప్రభుత్వం నూతన మెట్రోపాలసీని రూపొందించింది. ఈ పాలసీలో భాగంగా విజయవాడ మెట్రో రైల్‌ ప్రాజెక్టును కచ్చితంగా పీపీపీ విధానంలో చేపట్టాల్సివుంటుంది. మెట్రో స్థానంలో లైట్‌రైల్‌ ప్రాజెక్టు వైపు ప్రభుత్వం దృష్టిసారించిన నేపథ్యంలో, ఇది కూడా తక్షణం లాభదాయకత ప్రాజెక్టు కాదు కాబట్టి పీపీపీ విధానంలో ఎవరూ ముందుకు వచ్చే పరిస్థితి ఉండదు. దీనిని దృష్టిలో ఉంచుకుని ప్రభుత్వం ఇన్నోవేటివ్‌ పీపీపీకి పచ్చజెండా ఊపింది. ఈ విధానంలో సివిల్‌ నిర్మాణాలను రాష్ట్రప్రభుత్వం చేపట్టి... ఆపరేషన్స్‌ నిర్వహణను మాత్రం ప్రైవేటు సంస్థలు చేపట్టే అవకాశం ఉంటుంది. ఈ విధానం వల్ల ప్రైవేటు సంస్థలు ఆసక్తి చూపిస్తాయని ప్రభుత్వం భావిస్తోంది.
|
|
|
